- ಕೇರಳದ ಯುಡಿಎಫ್ ಆಡಳಿತದ ಕುರಿತು ಸಂಚಾಲಕರಲ್ಲೇ ಅತೃಪ್ತಿ: ಅಡೂರ್ ಬೆನ್ನಲ್ಲೇ ವಿ. ಡಿ. ಕೂಡಾ ದೆಹಲಿಗೆ..
ತಿರುವನಂತಪುರಂ/ ದೆಹಲಿ( ಅ. 5):
ಕೇರಳದ ಯುಡಿಎಫ್ ಸರಕಾರದ ವಿರುದ್ಧ ಕಾಂಗ್ರೆಸ್ ನಲ್ಲೇ ಅತೃಪ್ತಿ ಸ್ಫೋಟವಾಗಿದ್ದು ಮುಖ್ಯಮಂತ್ರಿ ವಿ. ಡಿ. ಸತೀಶನ್ ವಿರುದ್ಧ ದೆಹಲಿ ಹೖಕಮಾಂಡಿಗೆ ದೂರು ಸಲ್ಲಿಕೆಯಾಗಿದೆ.
ಇತ್ತೀಚೆಗೆ ಸಿಎಂ ವಿ. ಡಿ. ಸತೀಶನ್ ಅವರ ಸರ್ವಾಧಿಕಾರಿ ಧೋರಣೆಯನ್ನು ಖಂಡಿಸಿ ಮಾಧ್ಯಮಗಳ ಮುಂದೆ ಬಹಿರಂಗ ಹೇಳಿಕೆ ನೀಡಿದ್ದ ಯುಡಿಎಫ್ ರಾಜ್ಯ ಸಂಚಾಲಕ ಹಾಗೂ ಹಿರಿಯ ನಾಯಕ ಅಡೂರ್ ಪ್ರಕಾಶನ್ ಅವರು ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರಿಗೆ ವಿ. ಡಿ. ಸತೀಶನ್ ವಿರುದ್ಧ ದೂರು ನೀಡಿದ್ದಾರೆ. ಕೆಪಿಸಿಸಿ ಅಧ್ಯಕ್ಷ ಸ್ಥಾನದಲ್ಲಿ ಮುಂದುವರಿಯುತ್ತಿರುವ ಸನ್ನಿ ಜೋಸೆಫ್ ಕೂಡಾ ದೆಹಲಿಗೆ ತೆರಳಿ ಖರ್ಗೆ ಅವರನ್ನು ಭೇಟಿಯಾಗಿ ಕೇರಳದ ಪಕ್ಷದ ಆಂತರಿಕ ಬಿಕ್ಕಟ್ಟಿನ ಬೆಳವಣಿಗೆಯನ್ನು ಅವರ ಗಮನಕ್ಕೆ ತಂದಿದ್ದಾರೆ.
ಹಿರಿಯ ನಾಯಕ ಅಡೂರ್ ಪ್ರಕಾಶನ್ ಅವರ ದೂರನ್ನು ಹೖಕಮಾಂಡ್ ಪರಿಗಣಿಸುತ್ತಿರುವುದಾಗಿ ಕೆಪಿಸಿಸಿ ಅಧ್ಯಕ್ಷ ಸನ್ನಿ ಜೋಸೆಫ್ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
ಮುಖ್ಯಮಂತ್ರಿ ವಿ. ಡಿ. ಸತೀಶನ್ ಯುಡಿಎಫ್ ಒಕ್ಕೂಟದಲ್ಲಾಗಲೀ, ಕಾಂಗ್ರೆಸ್ ಪಕ್ಷದೊಳಗಾಗಲೀ ಚರ್ಚಿಸದೇ ಏಕಾಂಗಿ ನಿರ್ಧಾರ ಕೖಗೊಂಡು ಸರ್ವಾಧಿಕಾರಿ ಧೋರಣೆಯಿಂದ ವರ್ತಿಸುತ್ತಾರೆಂಬುದು ಅಡೂರ್ ಪ್ರಕಾಶನ್ ಆಕ್ಷೇಪವಾಗಿದೆ. ತಾನು ಯುಡಿಎಫ್ ಸಂಚಾಲಕನಾಗಿದ್ದರೂ ಯುಡಿಎಫ್ ಸರಕಾರದ ತೀರ್ಮಾನಗಳು ಸ್ವತಃ ತನಗೆ ಗೊತ್ತಾಗುತ್ತಿಲ್ಲ. ತಾನು ವಿಷಯವನ್ನು ಮಾಧ್ಯಮಗಳಿಂದ ಅರಿಯುತ್ತಿದ್ದೇನೆ ಎಂದವರು ಮಲ್ಲಿಕಾರ್ಜುನ ಖರ್ಗೆ ಅವರಲ್ಲಿ ದೂರಿದ್ದಾರೆ. ಇದೇ ಆರೋಪಗಳನ್ನು ಸಿಎಂ ವಿರುದ್ಧ ಅವರು ಕೆಪಿಸಿಸಿ ಕಚೇರಿಯಲ್ಲಿ ಸುದ್ದಿಗಾರರೊಂದಿಗೆ ಹೇಳಿದ್ದರು.
ದೆಹಲಿಗೆ ತೆರಳಿ ಹೖಕಮಾಂಡ್ ಗೆ ದೂರಿತ್ತರೂ ಬಳಿಕ ಅವರು ಮಾಧ್ಯಮಗಳ ಜತೆ ಮಾತಾಡಿಲ್ಲ. ತನ್ಮಧ್ಯೆ ವಿ. ಡಿ. ಸತೀಶನ್ ಸಂಪುಟದ ಸಚಿವ ಅನೂಪ್ ಜೇಕಬ್ ಅವರು ಅಡೂರ್ ಪ್ರಕಾಶನ್ ರನ್ನು ಭೇಟಿಯಾಗಿರುವುದು ಚರ್ಚಿತವಾಗಿದೆ. ಈತನ್ಮಧ್ಯೆ ಮುಖ್ಯಮಂತ್ರಿ ವಿ. ಡಿ. ಸತೀಶನ್ ಇಂದು ರಾತ್ರಿ ದೆಹಲಿಗೆ ತೆರಳಿ ಮಲ್ಲಿಕಾರ್ಜುನ ಖರ್ಗೆ ಅವರನ್ನು ಭೇಟಿ ಆಗುವರೆಂದು ಹೇಳಲಾಗಿದೆ.
