Narayan Chambaltimar

ಉಪ್ಪಳ(ಜು 19):
ಇಲ್ಲಿನ ಕುಬಣೂರು ಸುವರ್ಣ ಹೊಳೆ ಹರಿವನ್ನು ತಡೆಯುತ್ತಿದ್ದ ಭಾರೀ ಪ್ರಮಾಣದ ಮಾಲಿನ್ಯ ರಾಶಿಯನ್ನು ತೆಗೆದು ಹೊಳೆಯನ್ನು ಮಲಿನ ಮುಕ್ತವಾಗಿಸಿ ಸ್ವಚ್ಛಗೊಳಿಸುವ ಮೂಲಕ
ಕುಬಣೂರಿನ ನಾಗರಿಕರು ಪ್ರಶಂಸೆಗೆ ಪಾತ್ರರಾದರು.

ಕುಬಣೂರಿನ ಸುವರ್ಣಗಿರಿ ಹೊಳೆಯ ಕಿಂಡಿ ಅಣೆಕಟ್ಟಿನ ಭಾಗದಲ್ಲಿ ಮಳೆ ನೀರಿನೊಂದಿಗೆ ಕೊಚ್ಚಿ ಬಂದ ಬೃಹತ್ ಗಾತ್ರದ ಮರದ ದಿಮ್ಮಿಗಳ ಸಹಿತ ಮಾಲಿನ್ಯ ಕಟ್ಟಿ ನಿಂತು ಜಲ ಪ್ರವಾಹದ ಸುಗಮತೆಯನ್ನು ತಡೆದಿತ್ತು.
ಇಂದು ಭಾನುವಾರದ ಬಿಡುವಿನಲ್ಲಿ ಊರವರು, ಶ್ರೀರಾಮ ಯುವಕ ಕಲಾ ಮಂಡಳಿಯ ಸದಸ್ಯರು, ಅಗ್ನಿಶಾಮಕ ದಳ ಸಿಬಂದಿಗಳು ಸೇರಿ ಮಾಲಿನ್ಯ ರಾಶಿ ತೆರವು ಮಾಡಿದರು. ಗ್ರಾ. ಪಂ. ಸದಸ್ಯೆ ಸಾಕ್ಷಿ ಶೆಟ್ಟಿ, ವಸಂತ ಮಯ್ಯ ತಿಂಬರ, ಸತೀಶ್ ಮಾಸ್ತರ್ ಒಡ್ಡಂಬೆಟ್ಟು ಮೊದಲಾದವರು ನೇತೃತ್ವ ನೀಡಿದರು.

ತಿರುವನಂತಪುರ( ಜು 19):

ವಿಶ್ವಕಪ್ ಫುಟ್ಬಾಲ್ ಪಂದ್ಯಾಟದ ಅಂತಿಮ ಹಣಾಹಣಿಯ ಫೖನಲ್ ಹಿನ್ನೆಲೆಯಲ್ಲಿ ನಾಳೆ ( ಸೋಮವಾರ) ಕೇರಳ ರಾಜ್ಯದ ಶೖಕ್ಷಣಿಕ ಸಂಸ್ಥೆಗಳಿಗೆ ಸರಕಾರ ರಜೆ ಘೋಷಿಸಿದೆ.
ರಾಜ್ಯದ ಸಾರ್ವಜನಿಕ ಶಿಕ್ಷಣ ಸಂಸ್ಥೆಯ ಆಧೀನದಲ್ಲಿರುವ ಎಲ್ಲಾ ಶೖಕ್ಷಣಿಕ ಸಂಸ್ಥೆಗಳಿಗೂ ಇದು ಅನ್ವಯವಾಗಿದೆ. ಇಂದು ಮಧ್ಯರಾತ್ರಿ 12.30 ರಿಂದ ಅರ್ಜಂಟೀನ ಸ್ಪೖನ್ ನಡುವೆ ಫೖನಲ್ ಕಾದಾಟ ನಡೆಯಲಿದೆ. ಫೖನಲ್ ಪಂದ್ಯನಡುರಾತ್ರಿಯಿಂದ ಮುಂಜಾವ ತನಕ ನಡೆಯಲಿರುವುದರಿಂದ ವಿದ್ಯಾರ್ಥಿ ವಿಶ್ರಾಂತಿಗಾಗಿ ನಾಳೆ ರಜೆ ಘೋಷಿಸಲಾಗಿದೆ.

ದೆಹಲಿ( ಜು 19):
ರಾಷ್ಟ್ರ ರಾಜಧಾನಿಯ ಜಂತರ್ ಮಂಥರ್ ನಲ್ಲಿ ಕೇಂದ್ರ ಸರಕಾರೀ ಧೋರಣೆ ಪ್ರತಿಭಟಿಸಿ ಉಪವಾಸ ಸತ್ಯಾಗ್ರಹ ನಿರತರಾಗಿದ್ದ ಸಾಮಾಜಿಕ ಹೋರಾಟಗಾರ ಸೊನಮ್ ವಾಂಗ್ಚೂಕ್ ಅವರ ಆರೋಗ್ಯ ಹದಗೆಟ್ಟಿದ್ದು, ಆರೋಗ್ಯ ಸ್ಥಿತಿ-ಗತಿಗಳ ಮೇಲೆ ತೀವ್ರ ನಿಗಾ ಇರಿಸಲಾಗಿದೆ. ಅವರನ್ನು ವಿಶೇಷ ತುರ್ತು ನಿಗಾ ಘಟಕದಲ್ಲಿರಿಸಿ ಅಗತ್ಯ ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ಸಫ್ದರ್ ಜಂಗ್ ಆಸ್ಪತ್ರೆ ಪ್ರಕಟಣೆ ನೀಡಿದೆ.

ಅವರಿಗೆ 24 ಗಂಟೆಯ ಕ್ಲಿನಿಕಲ್ ನಿಗಾ ಅಗತ್ಯವಿದ್ದು, ರಕ್ತದಲ್ಲಿ ಏರುಪೇರು ಉಂಟಾಗಿದೆ ಎಂದು ಮೆಡಿಕಲ್ ಬುಲ್ಲೆಟಿನ್ ಉಲ್ಲೇಖಿಸಿದೆ.

ನೀಟ್ ಪ್ರಶ್ನೆ ಪತ್ರಿಕೆ ಸೋರಿಕೆ ಶಿಕ್ಷಣ ವ್ಯವಸ್ಥೆಯಲ್ಲಿನ ಅಕ್ರಮ ಸಂಬಂಧ ಕೇಂದ್ರ ಶಿಕ್ಷಣ ಸಚಿವ ದರ್ಮೇಂದ್ರ ಪ್ರಧಾನ್ ರಾಜೀನಾಮೆ ಸಲ್ಲಿಸಬೇಕೆಂದು ಆಗ್ರಹಿಸಿ ಕಾಕ್ರೋಚ್ ಜನತಾ ಪಾರ್ಟಿ(ಸಿಜೆಪಿ) ಪರ ಕಳೆದ 21ದಿನಗಳಿಂದವರು ಉಪವಾಸ ಸತ್ಯಾಗ್ರಹ ನಿರತರಾಗಿದ್ದರು. ನಿನ್ನೆ ಅವರನ್ನು ದೆಹಲಿ ಪೋಲೀಸರು ಬಲವಂತದಿಂದ ಆಸ್ಪತ್ರೆಗೆ ದಾಖಲಿಸಿದ್ದರು.

ಸುದೀರ್ಘ ದಿನದ ಉಪವಾಸದಿಂದ ವಾಂಗ್ಚೂಕ್ ಅವರ ಆರೋಗ್ಯದಲ್ಲಿ ಏರು ಪೇರಾಗಿದೆ. ಈ ಹಿನ್ನೆಲೆಯಲ್ಲಿ ತಜ್ಞ ವೖದ್ಯರ ನಿಗಾ ಮುಂದುವರಿದಿದೆ.
ವೖದ್ಯರ ತಂಡ ಮತ್ತು ಮೆಡಿಕಲ್ ತಜ್ಞರು ಸತತ ಒತ್ತಾಯಿಸಿದರೂ ವಾಂಗ್ಚೂಕ್ ಅವರು ಉಪವಾಸ ಮುರಿದು ಔಷಧಿ ಸೇವಿಸಲು ನಿರಾಕರಿಸಿದ್ದಾರೆಂದು ವರದಿಯಾಗಿದೆ. ವಾಂಗ್ಚೂಕ್ ಅವರ ಚಿಕಿತ್ಸೆಗೆ ಅವರ ಕುಟುಂಬದವರು ಒಪ್ಪಿಗೆ ಇತ್ತಿರಲಿಲ್ಲವೆಂದೂ ಹೇಳಲಾಗಿದೆ.

• ಸೌತ್ ಇಂಡಿಯನ್ ಬೇಂಕ್ ಸೀತಾಂಗೋಳಿ ಶಾಖೆ ನಷ್ಟ ಪರಿಹಾರ ನೀಡಬೇಕೆಂದು ಬಳಕೆದಾರರ ನ್ಯಾಯಾಲಯ ಆದೇಶ

ಕುಂಬಳೆ(ಜು19):
ಖಾತೆಯಲ್ಲಿ ಮಿನಿಮಂ ಬ್ಯಾಲೆನ್ಸ್ ಹಣ ಇಲ್ಲ ಎಂಬ ಕಾರಣ ಮುಂದಿರಿಸಿ ಗ್ರಾಹಕರೊಬ್ಬರಿಗೆ ದಂಡ ವಿಧಿಸಿದ ಬೇಂಕ್ ಗ್ರಾಹಕನಿಗೆ ನಷ್ಟ ಪರಿಹಾರ ನೀಡಬೇಕೆಂದು ಬಳಕೆದಾರರ ನ್ಯಾಯಾಲಯ ಆದೇಶಿಸಿದೆ. ಗ್ರಾಹಕನಿಗೆ ಉಂಟಾದ ಮಾನಸಿಕ ಕಿರಿಕಿರಿ ಮತ್ತು ಅಸೌಕರ್ಯಗಳನ್ನು ಪರಿಗಣಿಸಿ ಯಥೋಚಿತ ನಷ್ಟಪರಿಹಾರ ಸೌಲಭ್ಯ ನೀಡಬೇಕೆಂದು ಸೌತ್ ಇಂಡಿಯನ್ ಬೇಂಕಿನ ಸೀತಾಂಗೋಳಿ ಶಾಖೆಗೆ ಕಾಸರಗೋಡು ಜಿಲ್ಲಾ ಬಳಕೆದಾರರ ನ್ಯಾಯಾಲಯ ಆದೇಶಿಸಿದೆ.

ಸೀತಾಂಗೋಳಿ ಸೌತ್ ಇಂಡಿಯನ್ ಬೇಂಕ್ ವಿರುದ್ಧ ಅಲ್ಲಿ ಖಾತೆ ಹೊಂದಿದ್ದ ರಾಜು ಸ್ಟೀಫನ್ ಡಿಸೋಜ ಎಃಬವರು ಬಳಕೆ ದಾರರ ನ್ಯಾಯಾಲಯಕ್ಕೆ ನೀಡಿದ್ದ ದೂರು ವಿಚಾರಿಸಿ ಈ ಆದೇಶ ನೀಡಲಿಗಿದೆ.
ರಾಜು ಸ್ಟೀಫನ್ ಅವರು 2022 ರಲ್ಲಿ ಪ್ರಸ್ತುತ ಬೇಂಕಿನ ಸೀತಾಂಗೋಳಿ ಶಾಖೆಯಲ್ಲಿ ಕರೆಂಟ್ ಅಕೌಂಟ್ ಹೊಂದಿದ್ದರು. ಅಗತ್ಯದ ಹಣವನ್ನಷ್ಟೇ ಇರಿಸಿ ಖಾತೆ ಹೊಂದಲಾಗಿತ್ತು. ಆದರೆ ಎಸ್. ಎಂ. ಎಸ್. ಶುಲ್ಕ ಎಂಬ ನೆಪದಲ್ಲಿ ಇವರ ಖಾತೆಯಿಂದ ಬೇಂಕು 295 ರೂ ವಸೂಲಿ ಮಾಡಿತು. ಈ ಮೂಲಕ ಖಾತೆಯಲ್ಲಿ ಮಿನಿಮಂ ಬೇಲೆನ್ಸಿಗಿಂತಲೂ ಹಣ ಕಡಿಮೆಯಾಯಿತು. ಈ ಕ್ರಮವನ್ನು ಪ್ರಶ್ನಿಸಿ ಬಳಕೆದಾರರ ನ್ಯಾಯಾಲಯಕ್ಕೆ ದೂರು ನೀಡಲಾಗಿತ್ತು.

ಕಾಸರಗೋಡು(ಜು 18):
ಶ್ರೀ ಪುಷ್ಪಕ ಬ್ರಾಹ್ಮಣ ಸೇವಾ ಸಂಘದ ಕಾಸರಗೋಡು ಪ್ರಾದೇಶಿಕ ಸಭೆಯ ಕುಟುಂಬ ಸಭೆ ಅಧ್ಯಕ್ಷ ಟಿ.ಎಂ. ಪದ್ಮನಾಭನ್ ನಂಬೀಶನ್ ಅವರ ನಿವಾಸದಲ್ಲಿ ನಡೆಯಿತು. ಸಾಮುದಾಯಿಕ ಸಮಸ್ಯಾ, ಸವಾಲುಗಳ ಚಿಂತನೆಗಾಗಿ ನಡೆದ ಸಭೆಯಲ್ಲಿ
ಗಿರಿಜಾ ಪದ್ಮನಾಭನ್ ಸ್ವಾಗತಿಸಿದರು.

ಕಾರ್ಯದರ್ಶಿ ವರದಿ ಓದಿದರು. ಖಜಾಂಚಿ ಲೆಕ್ಕಪತ್ರ ಮಂಡಿಸಿದರು. ರಾಷ್ಟ್ರೀಯ ಸಮ್ಮೇಳನ ಸಂಘಟನಾ ಸಮಿತಿ ಅಧ್ಯಕ್ಷ ವಿ.ಎಂ. ಕೃಷ್ಣಪ್ರಸಾದ್ ಸಭೆಯ ವಿವರಗಳನ್ನು ವಿವರಿಸಿದರು. ಸಾಮಾನ್ಯ ಸಂಯೋಜಕ ರಾಜೇಶ್ ಇ. ನಿಧಿ ಸಂಗ್ರಹದ ಕುರಿತು ಮಾತನಾಡಿದರು. ಸಭೆಯ ಭಾಗವಾಗಿ ಆಯೋಜಿಸಲಾದ ಲಕ್ಕಿ ಡಿಪ್ ಕಪ್ ಅನ್ನು ಕಾರ್ಯದರ್ಶಿ, ಹಿರಿಯ ಸದಸ್ಯೆ ಕಲ್ಯಾಣಿ ಅಮ್ಮ ಉದ್ಘಾಟಿಸಿದರು. ಕಾರ್ಯಕಾರಿ ಸಮಿತಿ ಸದಸ್ಯ ಗಣೇಶನ್ ಧನ್ಯವಾದ ಅರ್ಪಿಸಿದರು.

• ಮಂಗಳೂರು ತುಳು ಅಕಾಡೆಮಿಯಲ್ಲೊಂದು ದಿನದ “ಬಲೇ ತುಳು ಓದುಗ” ಅಭಿಯಾನದಲ್ಲಿ ಉದ್ಘಾಟಕಿ ಮಾತು

ಮಂಗಳೂರು (ಜು 18):
:ತುಳುನಾಡು ಮಾತೃ ಮೂಲ ಸಂಸ್ಕೃತಿಯ ನಾಡು ಮತ್ತು ಮಾತೃ ಪ್ರಧಾನ ಮಹಿಳಾ ಗೌರವದ
ಸಾಮಾಜಿಕ ವ್ಯವಸ್ಥೆ ನಮ್ಮಲಿತ್ತು, ಇವತ್ತಿನ ಬದಲಾಗುತ್ತಿರುವ ಸಾಮಾಜಿಕ ಸನ್ನಿವೇಶದ ನಡುವೆಯೂ ಮಹಿಳೆಯರು ತಮ್ಮ ಸ್ಥಾನಮಾನ, ಗೌರವ, ಸಾಮಾರ್ಥ್ಯದ ಬಗ್ಗೆ ಪ್ರಜ್ಞಾಪೂರ್ವಕವಾಗಿ ಮುಂದೆ ನಿಲ್ಲಬೇಕು. ಮಹಿಳೆ ತನ್ನ ಸ್ವಾತಂತ್ರ್ಯ ಕಾಪಿಡಬೇಕು ಎಂದು ಹಿರಿಯ ಲೇಖಕಿ, ಚಿಂತಕಿ ಅತ್ರಾಡಿ ಅಮೃತ ಶೆಟ್ಟಿ ಅಭಿಪ್ರಾಯಪಟ್ಟರು.

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿಯು ಮಂಗಳೂರಿನ ಸಂವಾದ ಯುವ ಸಂಪನ್ಮೂಲ ಕೇಂದ್ರ ಸಂಸ್ಥೆಯ ಸಹಭಾಗಿತ್ವದಲ್ಲಿ ಹಮ್ಮಿಕೊಂಡ ‘ಅಕಾಡೆಮಿಡ್ ಒಂಜಿ ದಿನ ಬಲೆ ತುಳು ಓದುಗ’ ಕಾರ್ಯಕ್ರಮದ 14ನೇ ಕೂಟವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಯಾಗಿ ಪಾಲ್ಗೊಂಡ ಸಂವಾದ ಯುವ ಸಂಪನ್ಮೂಲ ಕೇಂದ್ರದ ಯೂತ್ ಆಕ್ಷ್ಯನ್ ಕನಿಯರ್ ಮಂಜುಳಾ ಸುನಿಲ್ ಅವರು ಮಾತನಾಡಿ, ತುಳು ಭಾಷೆ, ಸಾಹಿತ್ಯದ, ಸಂಸ್ಕೃತಿ ಬಗ್ಗೆ ಅಭಿರುಚಿ ಮೂಡಿಸುವ ನಿಟ್ಟಿನಲ್ಲಿ ‘ಅಕಾಡೆಮಿಡ್ ಒಂಜಿ ದಿನ ಬಲೆ ತುಳು ಓದುಗ’ ಕಾರ್ಯಕ್ರಮ ಒಂದು ವಿಶಿಷ್ಟ ಪರಿಕಲ್ಪನೆಯ ಕಾರ್ಯಕ್ರಮ ಎಂದು ಹೇಳಿದರು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ತಾರಾನಾಥ್ ಗಟ್ಟಿ ಕಾಪಿಕಾಡ್ ಅವರು ಮಾತನಾಡಿ, ತುಳು ಭಾಷೆಯಲ್ಲಿ ಪ್ರಕಟಗೊಂಡ ಸಾಹಿತ್ಯದ ಪರಿಚಯ ವಿದ್ಯಾರ್ಥಿಗಳಿಗೆ ಆಗಬೇಕು ಅನ್ನುವ ಆಶಯದೊಂದಿಗೆ ‘ಬಲೆ ತುಳು ಓದುಗ’ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ ಎಂದು ತಿಳಿಸಿದರು.

ಕಾರ್ಯಕ್ರಮದಲ್ಲಿ ವಿದ್ಯಾರ್ಥಿ ಸಂಚಾಲಕ ಮನೋಜ್ ಕುಮಾ‌ರ್ ವೇಣೂರು ಉಪಸ್ಥಿತರಿದ್ದರು. ಅಕಾಡೆಮಿಯ ಸದಸ್‌ಯ ಪಾಂಗಾಳ ಬಾಬು ಕೊರಗ ಕಾರ್ಯಕ್ರಮ ನಿರೂಪಿಸಿ, ವಂದಿಸಿದರು. ಕಾರ್ಯಕ್ರಮದಲ್ಲಿ ಭಾಗವಹಿಸಿದ ಸಂವಾದ ಯುವ ಸಂಪನ್ಮೂಲ ಕೇಂದ್ರದ ವಿವಿಧ ಕಾಲೇಜಿನ 40 ವಿದ್ಯಾರ್ಥಿಗಳು ಅಕಾಡೆಮಿಯ ಗ್ರಂಥಾಲಯದಲ್ಲಿ ತುಳು ಸಾಹಿತ್ಯ ಕೃತಿಗಳನ್ನು ಓದಿ ಸಮಾರೋಪ ಕಾರ್ಯಕ್ರಮದಲ್ಲಿ ತಮ್ಮ ಅಭಿಪ್ರಾಯ ಹಂಚಿಕೊಂಡರು.

• ನರೇಂದ್ರ ಮೋದಿ ಸರಕಾರ ಸುಸ್ಥಿರ ಆಡಳಿತಕ್ಕೆ ಜಗತ್ತಿಗೇ ಮಾದರಿ-ಶಿಬಿರ ಉದ್ಘಾಟಿಸಿದ ಮಹಿಳಾ ನಾಯಕಿ ನವ್ಯಾ ಹರಿದಾಸ್

ಪೆರ್ಲ(ಜು 18):
ನರೇಂದ್ರ ಮೋದಿ ಸರ್ಕಾರವು ಸುಸ್ಥಿರ ಆಡಳಿತಕ್ಕೆ
ಜಗತ್ತಿನ ದೇಶಗಳಿಗೇ ಮಾದರಿಯಾಗಿದ್ದು, ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರಗಳು ಸೇರಿದಂತೆ ಭಾರತ ಸಾಧಿಸಿರುವ ಪ್ರಗತಿಯು ಮುಂದುವರಿದ ದೇಶಗಳನ್ನೂ ಬೆರಗುಗೊಳಿಸಿದೆ ಎಂದು ಬಿಜೆಪಿ ಮಹಿಳಾ ಮೋರ್ಚಾ ರಾಜ್ಯ ಅಧ್ಯಕ್ಷೆ ನವ್ಯಾ ಹರಿದಾಸ್ ಅಭಿಪ್ರಾಯಪಟ್ಟರು.
ಬಿಜೆಪಿ ಕುಂಬಳೆ ಮಂಡಲ ಘಟಕ ಹಮ್ಮಿಕೊಂಡಿದ್ದ ಪಂಡಿತ್ ದೀನ್ ದಯಾಳ್ ಉಪಾಧ್ಯಾಯ ಪ್ರಶಿಕ್ಷಣ್ ಮಹಾ ಅಭಿಯಾನದ ದ್ವಿದಿನ ಶಿಬಿರವನ್ನು ಪೆರ್ಲದಲ್ಲಿ
ಉದ್ಘಾಟಿಸಿ ಅವರು ಮಾತನಾಡುತ್ತಿದ್ದರು.

ದೇಶದ ಅರ್ಧದಷ್ಟಿರುವ ಮಹಿಳಾ ಸಮಾಜದ ಕಲ್ಯಾಣವನ್ನು ಖಾತರಿಪಡಿಸಲು ನರೇಂದ್ರ ಮೋದಿ ಸರ್ಕಾರಕ್ಕೆ ಸಾಧ್ಯವಾಗಿದೆ ಎಂದು ಅವರು ಹೇಳಿದರು. ಕೇಂದ್ರ ಸರ್ಕಾರದ ಕಲ್ಯಾಣ ಯೋಜನೆಗಳು ಅರ್ಹ ಫಲಾನುಭವಿಗಳಿಗೆ ತಲುಪುವುದನ್ನು ಖಚಿತಪಡಿಸುವ ಮೂಲಕ ಆಡಳಿತದಲ್ಲಿ ಪಾರದರ್ಶಕತೆ ಮತ್ತು ದಕ್ಷತೆಯನ್ನು ಸಾಧಿಸಲಾಗಿದೆ ಎಂದು ಅವರು ಬೊಟ್ಟು ಮಾಡಿ ತೋರಿಸಿದರು.

ಮೋದಿ ಸರ್ಕಾರದ ಅಭಿವೃದ್ಧಿ ಸಾಧನೆಗಳನ್ನು ಜನರಿಗೆ ತಲುಪಿಸಲು ಮತ್ತು ಮತದಾರರ ಸಮಸ್ಯೆಗಳನ್ನು ಆಲಿಸಿ ಪರಿಹಾರಕ್ಕಾಗಿ ಶ್ರಮಿಸಲು ಸಾಧ್ಯವಾಗಿದ್ದೇ ರಾಜ್ಯದ ಮೂರು ವಿಧಾನಸಭಾ ಕ್ಷೇತ್ರಗಳಲ್ಲಿ ಎನ್‌ಡಿಎ ವಿಜಯಕ್ಕೆ ಕಾರಣವಾಯಿತು ಎಂದು ಅವರು ಹೇಳಿದರು. ತ್ರಿಪುರಾ ಮತ್ತು ಪಶ್ಚಿಮ ಬಂಗಾಳದಲ್ಲಿ ಆದಂತೆ ಕೇರಳದಲ್ಲೂ ಬಿಜೆಪಿ ಅಧಿಕಾರಕ್ಕೆ ಬರುವ ಕಾಲ ದೂರವಿಲ್ಲ ಎಂದು ನವ್ಯಾ ಹರಿದಾಸ್ ನುಡಿದರು.

ಬಿಜೆಪಿ ಕುಂಬಳೆ ಮಂಡಲದ ಉಪಾಧ್ಯಕ್ಷ ವಿಕ್ರಮ್ ಪೈ ಅಧ್ಯಕ್ಷತೆ ವಹಿಸಿದ್ದರು.

ಬಿಜೆಪಿ ಜಿಲ್ಲಾ ಅಧ್ಯಕ್ಷರಾದ ಎಂ. ಎಲ್. ಅಶ್ವಿನಿ, ರಾಜ್ಯ ಸಮಿತಿ ಸದಸ್ಯರಾದ ವಿ. ರವೀಂದ್ರನ್, ಅಡ್ವ. ವಿ. ಬಾಲಕೃಷ್ಣ ಶೆಟ್ಟಿ, ಸತೀಶ್ ಚಂದ್ರ ಭಂಡಾರಿ, ಕೋಝಿಕೋಡ್ ವಲಯ ಉಪಾಧ್ಯಕ್ಷ ವಿಜಯ್ ಕುಮಾರ್ ರೈ, ಜಿಲ್ಲಾ ಉಪಾಧ್ಯಕ್ಷರಾದ ಪಿ. ರಮೇಶ್, ಮುರಳೀಧರ್ ಯಾದವ್, ರಾಜ್ಯ ಕೌನ್ಸಿಲ್ ಸದಸ್ಯ ಜಯಂತ ಪಾಟಾಳಿ, ಎಸ್‌ಟಿ ಮೋರ್ಚಾ ಜಿಲ್ಲಾ ಅಧ್ಯಕ್ಷ ನಾರಾಯಣ ನಾಯಕ್, ಮಹಿಳಾ ಮೋರ್ಚಾ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಪ್ರೇಮಲತಾ ಎಸ್., ಒಬಿಸಿ ಮೋರ್ಚಾ ಜಿಲ್ಲಾ ಅಧ್ಯಕ್ಷ ಕೆ.ಪಿ. ವತ್ಸರಾಜ್, ಒಬಿಸಿ ಮೋರ್ಚಾ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ದಯಾನಂದ ಕೆ. ಮತ್ತು ರೂಪವಾಣಿ ಭಟ್ ಮಾತನಾಡಿದರು.

ಪೆರ್ಲ ಶಂಕರ ಸದನದಲ್ಲಿ ನಡೆಯುತ್ತಿರುವ ದ್ವಿದಿನ ಪ್ರಶಿಕ್ಷಣ ಶಿಬಿರದಲ್ಲಿ ಜನಪ್ರತಿನಿಧಿಗಳು ಹಾಗೂ ಪಕ್ಷದ ಪದಾಧಿಕಾರಿಗಳು ಸೇರಿದಂತೆ ನೂರರಷ್ಟು ಮಂದಿ ಭಾಗವಹಿಸುತ್ತಿದ್ದಾರೆ.

• ವರ್ತಮಾನ ರಾಜಕೀಯಕ್ಕೆ ಜನನಾಯಕ ಉಮ್ಮನ್ ಚಾಂಡಿ ಆದರ್ಶ ಪುರುಷ- ಶ್ಯಾಮ ಪ್ರಸಾದ್ ಮಾನ್ಯ

ಬದಿಯಡ್ಕ(ಜು 18):
ಬದಿಯಡ್ಕ ಮಂಡಲ ಕಾಂಗ್ರೆಸ್ ಸಮಿತಿಯ ನೇತೃತ್ವದಲ್ಲಿ ಮಾಜಿ ಮುಖ್ಯಮಂತ್ರಿ , ಜನ ನಾಯಕ ಉಮ್ಮನ್ ಚಾಂಡಿಯವರ ಮೂರನೇ ವರ್ಷದ ಸಂಸ್ಮರಣಾ ಕಾರ್ಯಕ್ರಮವನ್ನು ಬದಿಯಡ್ಕ ಮಂಡಲ ಕಾಂಗ್ರೆಸ್ ಸಮಿತಿ ಕಚೇರಿಯಲ್ಲಿ ನಡೆಸಲಾಯಿತು.

ಬದಿಯಡ್ಕ ಮಂಡಲ ಕಾಂಗ್ರೆಸ್ ಸಮಿತಿ ಅಧ್ಯಕ್ಷ ಶ್ಯಾಮ ಪ್ರಸಾದ್ ಮಾನ್ಯ ಅವರ ಅಧ್ಯಕ್ಷತೆಯಲ್ಲಿ ಉಮ್ಮನ್ ಚಾಂಡಿಯವರ ಭಾವಚಿತ್ರಕ್ಕೆ ಪುಷ್ಪಾರ್ಚನೆ ಮಾಡುವುದರ ಮೂಲಕ ಕಾರ್ಯಕ್ರಮ ಉದ್ಘಾಟಿಸಿದರು. ಈ ಸಂದರ್ಭ ಮಾತನಾಡಿದ ಅವರು ರಾಜಕೀಯ ನಾಯಕರ ಸಂಸ್ಕಾರ-ಸಂಸ್ಕೃತಿಯೇ ಬದಲಾಗಿರುವ ವರ್ತಮಾನ ರಾಜಕೀಯಕ್ಕೆ ಉಮ್ಮನ್ ಚಾಂಡಿ ಆದರ್ಶ ಪುರುಷರು. ಅವರ ಸರಳತೆಯ ನಯ, ವಿನಯ ಮತ್ತು ಜನ ಸೇವಾ ಕಾಳಜಿ ಇನ್ಯಾರಲ್ಲೂ ಇಲ್ಲ. ಅವರು ನಮ್ಮ ಮಾದರಿಯ ಆದರ್ಶ ನಾಯಕ ಎಂದು ನುಡಿದರು.

ನೇತಾರರಾದ ಜಗನ್ನಾಥ ರೈ , ತಿರುಪತಿ ಕುಮಾರ್ ಭಟ್ , ರಾಮ ಪಟ್ಟಾಜೆ , ಶಾಫಿ ಗೋಳಿಯಡ್ಕ , ಶ್ರೀನಾಥ್ ಬದಿಯಡ್ಕ , ನಿರಂಜನ ರೈ, ಲೋಹಿತಾಕ್ಷನ್ , ನಾರಾಯಣ ಭಂಡಾರಿ, ಕೇಶವ ಬದಿಯಡ್ಕ , ಚಂದ್ರಹಾಸನ್ ಮಾಸ್ಟರ್ , ಗೋಪಾಲ.ಡಿ, ಹಾಗೂ ಮಂಡಲ , ವಾರ್ಡು , ಬೂತು ಮಟ್ಟದ
ನೇತಾರರು ಭಾಗವಹಿಸಿದರು.

• ಗಂಗಾವಳಿ ನದಿಯ ಹುಚ್ಚೋಟಕ್ಕೆ ಕೊಚ್ಚಿ ಹೋದ ಲಾರಿ ಚಾಲಕ ಅರ್ಜುನ್ ದಾರುಣಾಂತ್ಯಕ್ಕೆ ಎರಡು ವರ್ಷ ಪೂರೖಸಿದ ವೇಳೆ ಕೃತಿ…

ಕುಂಬಳೆ(ಜು 18):
ಕೇವಲ ಎರಡು ವರ್ಷದ ಹಿಂದೆ…
ಇದು ಸುಲಭದಲ್ಲಿ ಯಾರೂ ಮರೆಯುವಂತದ್ದಲ್ಲ!
ಜೋರಾಗಿ ಮಳೆ ಸುರಿದು ಕಾರವಾರ ಸಮೀಪದ ಶಿರೂರಿನ ಗಂಗಾವಳಿ ಹೊಳೆಯ ಹುಚ್ಚು ರಭಸಕ್ಕೆ ಭೂಕುಸಿತದೊಂದಿಗೆ ಪ್ರವಾಹ ಪಾಲಾದ ಕೇರಳದ ಕೋಝಿಕ್ಕೋಡಿನ ಲಾರಿ ಚಾಲಕ ಅರ್ಜುನ್ ನನ್ನು ಸುಲಭದಲ್ಲಿ ಮರೆಯಲು ಸಾಧ್ಯವೇ..?
ಶಿರೂರಿನ ಆ ಮಹಾ ದುರಂತಕ್ಕೀಗ ಭರ್ತಿ ಎರಡು ವರ್ಷ ದಾಟಿದೆ..

ಶಿರೂರಿನಲ್ಲಿ ಲಾರಿ ಮತ್ತು ಚಾಲಕ ಅರ್ಜುನ್ ಪತ್ತೆಗಾಗಿ ನಡೆದ ಭರ್ತಿ 72ದಿನಗಳ ಹುಡುಕಾಟಕ್ಕೆ ಸಾರಥ್ಯ ನೀಡಿದ ಮಂಜೇಶ್ವರ ಶಾಸಕ ಎಕೆಎಂ ಅಶ್ರಫ್ ಆ ದಿನಗಳಲ್ಲಿ ತಾನನುಭವಿಸಿದ ಕಣ್ಣೀರಿನ ವ್ಯಥೆಯ ನೆನಪುಗಳನ್ನು ಈಗ ಪುಸ್ತಕವಾಗಿ ಪೋಣಿಸಿದ್ದಾರೆ.
“ಶಿರೂರಿನ 72 ದಿನಗಳು” ಎಂಬ ಈ ಕೃತಿ ಮಲಯಾಳಂ ನಲ್ಲಿ ರಚಿತವಾಗಿದ್ದು, ಶೀಘ್ರವೇ ಕೇರಳ ವಿಧಾನಸಭೆಯಲ್ಲಿ ಬಿಡುಗಡೆಯಾಗಲಿದೆ.
ಕನ್ನಡ ಮಾಧ್ಯಮದಲ್ಲಿ ಕಲಿತ ಮಂಜೇಶ್ವರ ಶಾಸಕರೊಬ್ಬರು ಮಲಯಾಳಂ ನಲ್ಲಿ ಬರೆದ ಕೃತಿ ವಿಧಾನಸಭೆಯಲ್ಲಿ ಬಿಡುಗಡೆ ಕಾಣಲಿರುವುದು ಇದೇ ಮೊದಲು!

ಪಶ್ಚಿಮ ಘಟ್ಟ ತಪ್ಪಲಿನ ಶಿರೂರು ಗಂಗಾವಳಿ ಹೊಳೆಯ ಹುಚ್ಚೋಟದ ನಡುವೆ ಜಾತಿ, ಮತ, ಪಕ್ಷ, ವರ್ಣಗಳೆಲ್ಲ ಮರೆತು ಒಬ್ಬಾತ ಲಾರಿ ಚಾಲಕನನ್ನು ಕಾಪಾಡಲೆಂದು ಹೊರಟ ಈ ದೌತ್ಯ ಭರ್ತಿ 72ದಿನಗಳ
ಮಾನವಿಕತೆಯ ಶೋಕಗಾಥೆ. ಗಡಿನಾಡಿನ ಶಾಸಕನೊಬ್ಬ ಅಂತರ್ ರಾಜ್ಯಕ್ಕೆ ಸೇತುವೆಯಾಗಿ ಶಿರೂರಿನ ರಕ್ಷಣಾ ಚಟುವಟಿಕೆಗೆ ಸಾರಥ್ಯ ವಹಿಸಿದ ಕತೆ ಕೆಲವೊಮ್ಮೆ ನಾಳಿನ ಇತಿಹಾಸದಿಂದಲೇ ನೇಪಥ್ಯಕ್ಕೆ ಜಾರಬಹುದು. ಆದರೆ ಮಾನವೀಯತೆಯ ಮಮತೆ ಮೆರೆದ ಈ ಬಾಂಧವ್ಯದ ಕತೆ ಅಕ್ಷರ ಉಳ್ಳ ಕಾಲದ ವರೆಗೆ ಶಾಶ್ವತವಾಗಿರಬೇಕೆಂಬ ಆಶಯವೇ ಈ ಕೃತಿಗೆ ಪ್ರೇರೇಪಿಸಿತು ಎನ್ನುತ್ತಾರೆ ಶಾಸಕ ಎಕೆಎಂ ಅಶ್ರಫ್.

ಕರ್ನಾಟಕದ ಹುಬ್ಬಳ್ಳಿ ಕಡೆಯಿಂದ ಮರದ ದಿಮ್ಮಿಗಳನ್ನು ಲಾರಿಯಲ್ಲಿ ಹೇರಿ ಕೋಝಿಕ್ಕೋಡಿಗೆ ಬರುವಾಗ ಜುಲೖ 16ರಂದು ಸುರಿದ ಪ್ರಳಯ ಸದೃಶ ಮಳೆಯಲ್ಲಿ ದುರಂತ ಸಂಭವಿಸಿತ್ತು. ಮಹಾಮಳೆಗೆ ಬೆಟ್ಟವೇ ಜಾರಿ ಲಾರಿಯನ್ನು ಕೊಚ್ಚಿ ಕೊಂಡೊಯ್ದು ಹೊಳೆಗೆಸೆದ ಈ ದುರಂತ ಈಗ ಕರಾಳ ನೆನಪು.
ಆ ಬಳಿಕ ಲಾರಿ ಸಹಿತ ಅರ್ಜುನನ ಪತ್ತೆಗಾಗಿ ನಡೆದದ್ದು ಮಹಾಶೋಧ!

• 72 ದಿನಗಳ ಕಾರ್ಯಾಚರಣೆಯಲ್ಲಿ ಚಾಲಕ ಅರ್ಜುನ್ ನ ಅಸ್ಥಿ ಸಹಿತ ಪತ್ತೆಯಾದ ಲಾರಿ

ಕೇರಳದ ಮಾಧ್ಯಮಗಳ. ಮಾನವಿಕ ಕಾಳಜಿ, ಅಲ್ಲೇ ಠಿಕಾಣಿ ಹೂಡಿ ಮಳೆನೆನೆದು ಕಾರ್ಯಾಚರಣೆಗೆ ನೇತೃತ್ವ ಕೊಟ್ಟ ಶಾಸಕ. ಎಕೆಎಂ ಪರಿಶ್ರಮ, ಕೇರಳದ ಜನರೆಲ್ಲರ ಮೊರೆ ಇತ್ಯಾದಿಗಳನ್ನು ಕಂಡು ಕರ್ನಾಟಕದ ಮಾಧ್ಯಮಗಳು ಸಹಿತ ಜನತೆ ಅಚ್ಚರಿ ಪಟ್ಟಿದ್ದರು. ಮೃತಪಟ್ಟವರು ಮಂತ್ರಿಯ ಮಗನೇ..? ಪ್ರಶ್ನಿಸಿದ್ದರು.!
ಹೀಗೆ 71 ದಿನಗಳ ಹುಡುಕಾಟದ ಬಳಿಕ ಲಾರಿಯ ತುಂಡುಗಳ ಜತೆ ಅರ್ಜುನನ ಅಸ್ಥಿ ಪಂಜರ ಪತ್ತೆಯಾಗಿತ್ತು. ಅದೊಂದು ಮಹಾ ವಿಯೋಗದ ವಿಲಾಪಯಾತ್ರೆಯಾಗಿ ಮಧ್ಯರಾತ್ರಿ ಕಾಸರಗೋಡಿನಲ್ಲಿ ಸಾಗಿಹೋಗಿತ್ತು.ಆ ವೇಳೆಗೂ ನಿದ್ದೆಗಟ್ಟಿ ನಿಂತ ಜನರು ಕೇವಲ ಅಸ್ಥಿಪಂಜರ ಕಾಣಲು, ನಮಿಸಲು ಕಾತರರಾಗಿದ್ದರು!

ಹೀಗೆ ಕಾರ್ಯಾಚರಣೆಗೆ ಸಹಕಾರ ಕೊಟ್ಟ ಅಂದಿನ ಮುಖ್ಯಮಂತ್ರಿ ಸಿದ್ಧರಾಮಯ್ಯ, ಕಾರವಾರ ಶಾಸಕ ಸತೀಶ್ ಕೃಷ್ಣ ಸೖಲ್, ಜಿಲ್ಲಾಧಿಕಾರಿ ಲಕ್ಷ್ಮಿ ಪ್ರಿಯ, ಅರ್ಜುನನ ತಾಯಿ, ಪತ್ನಿ, ಅಳಿಯ ಎಲ್ಲರ ಅನುಭವಗಳ ನೆನಪಿನ ಗಾಥೆ ಈ ಕೃತಿಯಲ್ಲಿದೆ.

ಅರ್ಜುನನ ಪತ್ತೆಗಾಗಿ ನಡೆದ ಶೋಧ ಕಾರ್ಯಾಚರಣೆಗೆ ಅಡ್ಡಗಾಲಿಟ್ಟವರಿದ್ದಾರೆ. ದಿಕ್ಕು ತಪ್ಪಿಸಿದವರಿದ್ದಾರೆ.
ಈ ಎಲ್ಲಾ ಅನುಭವಗಳ ಜತೆಗೆ 2024ರ ಸೆ. 25ರಂದು ಮೃತ ಶರೀರದ ಅಸ್ಥಿಭಾಗ ಲಾರಿಯ ಜತೆಗೆ ಪತ್ತೆಯಾಗಿತ್ತು.
ಬಹುಶಃ ದೇಶದ ಮತ್ಯಾವ ರಾಜ್ಯದಲ್ಲೂ ಕಾಣದ ರೀತಿಯಲ್ಲೊಂದು ಮಮತೆಯ ಕಾಳಜಿಯ ಕಾರ್ಯಾಚರಣೆ ಅರ್ಜುನ್ ಗಾಗಿ ನಡೆದದ್ದು ಇತಿಹಾಸ.

ದೆಹಲಿ (ಜು 18):
ದೆಹಲಿಯ ಜಂತರ್ ಮಂತರ್ ನಲ್ಲಿ ಅನಿರ್ದಿಷ್ಟಾವಧಿ ಉಪವಾಸ ಸತ್ಯಾಗ್ರಹ ನಡೆಸುತ್ತಿದ್ದ ಸಾಮಾಜಿಕ ಹೋರಾಟಗಾರ ಸೋನಮ್ ವಾಂಗ್ಚೂಕ್ ಅವರನ್ನು ಸತ್ಯಾಗ್ರಹದ 19ನೇ ದಿನ ಆರೋಗ್ಯ ಸಂಪೂರ್ಣ ಕ್ಷೀಣಿಸಿದ ಹಿನ್ನೆಲೆಯಲ್ಲಿ, ಅಗತ್ಯ ವೖದಕೀಯ ನೆರವು ನೀಡುವುದಕ್ಕೆ ಪೊಲೀಸರು ಅವರನ್ನು ಸಪ್ದರ್ ಸಿಂಗ್ ಆಸ್ಪತ್ರೆಗೆ ಕೊಂಡೊಯ್ಯದರು.
ದೆಹಲಿ ಹೖಕೋರ್ಟ್ ನಿರ್ದೇಶನದಂತೆ ಆಸ್ಪತ್ರೆಗೆ ಸ್ಥಳಾಂತರಿಸಲಾಗಿದೆ.

ದೀರ್ಘಾವಧಿಯ ಉಪವಾಸ ಮತ್ತು ನಿರ್ಜಲೀಕರಣದಿಂದ ಅವರು ಬಳಲಿದ್ದಾರೆ. ಅವರ ಅಂಗಾಂಗಳನ್ನು ಮತ್ತೆ ಪೂರ್ವ ಸ್ಥಿತಿಗೆ ತರಲು ನಿರಂತರ ಚಿಕಿತ್ಸೆ ಅಗತ್ಯವಿದೆ.
ಇದೇ ವೇಳೆ ಸತ್ಯಾಗ್ರಹಿಗಳ. ಮೇಲೆ ಪೊಲೀಸ್ ದೌರ್ಜನ್ಯ ನಡೆಯಿತು ಎಂದು ಆರೋಪ ಎದ್ದಿದೆ. ಕಾಂಕ್ರೂಚ್ ಜನತಾ ಪಾರ್ಟಿ (ಸಿಜೆಪಿ ) ಸಂಸ್ಥಾಪಕ ಪೊಲೀಸ್ ನಡೆಯನ್ನು ಖಂಡಿಸಿದ್ದಾರಲ್ಲದೇ ಬಲವಂತದಿಂದ ವಾಂಗ್ಚೂಕ್ ಅವರನ್ನು ಬಿಳಿ ಬಟ್ಟೆಯಲ್ಲಿ ಸುತ್ತಿ ಕೊಂಡೊಯ್ದಿದ್ದಾರೆಂದು ಆರೋಪಿಸಿದ್ದಾರೆ. ಜತೆಗೆ ಏನೇ ಘಟಿಸಿದರೂ ಹೋರಾಟದಿಂದ ಹಿಂದಕ್ಕೆ ಸರಿಯುವುದಿಲ್ಲ ಎಂದು ಘೋಷಿಸಿ ಸಿಜೆಪಿ ಸ್ಥಾಪಕ ಅಭಿಜಿತ್ ದೀಪ್ಕೆ ಉಪವಾಸ ಸತ್ಯಾಗ್ರಹ ಆರಂಭಿಸಿದ್ದಾರೆ.