Narayan Chambaltimar

ಕಾಲ್ತುಳಿತದಿಂದ ಮಹಿಳೆ ಸಾವು ಪ್ರಕರಣ : ನಟ ಅಲ್ಲೂ ಅರ್ಜುನ್ ಗೆ ನ್ಯಾಯಾಂಗ ಬಂಧನ ವಿಧಿಸಿದ ನ್ಯಾಯಾಲಯ

ಮೊನ್ನೆ ಮೊನ್ನೆಯಷ್ಟೇ ಬಿಡುಗಡೆಯಾದ ಪುಷ್ಪ -2 ಸಿನಿಮ ಭಾರತೀಯ ಚಿತ್ರರಂಗದಲ್ಲೇ ಗಳಿಕೆಯ ದಾಖಲೆ ನಿರ್ಮಿಸಿ ನೆಗೆದೋಡುತ್ತಿದ್ದರೆ ಚಿತ್ರದ ನಾಯಕ ನಟ ಅಲ್ಲೂ ಅರ್ಜುನ್ ಜೈಲು ಕಂಬಿ ಎಣಿಸುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ಪುಷ್ಪ -2 ಬಿಡುಗಡೆಯಂದು ಪ್ರೀಮಿಯರ್ ಷೋ ನೋಡಲು ಬಂದಿದ್ದ,ಮಹಿಳೆಯೊಬ್ಬರು ಕಾಲ್ತುಳಿತಕ್ಕೆ ಸಿಲುಕಿ ಮೃತಪಟ್ಟ ಹಿನ್ನೆಲೆಯಲ್ಲಿ ಹೈದರಾಬಾದ್ ಪೋಲೀಸರು ತೆಲುಗು ಸೂಪರ್ ಸ್ಟಾರ್ ಅಲ್ಲೂ ಅರ್ಜುನ್ ನನ್ನು ಬಂಧಿಸಿದ್ದಾರೆ. ಬಳಿಕ ಅವರನ್ನು ನಂಬಪಳ್ಳಿ ಮೆಜಿಸ್ಟ್ರೇಟ್ ನ್ಯಾಯಾಲಯಕ್ಕೆ ಹಾಜರು ಪಡಿಸಲಾಯಿತು. ನ್ಯಾಯಾಲಯ ಬಂಧಿತ ನಟನಿಗೆ 14ದಿನಗಳ ನ್ಯಾಯಾಂಗ ಬಂಧನ ವಿಧಿಸಿದೆ.

ಬಂಧನದ ವಿರುದ್ಧ ನಟ ಸಲ್ಲಿಸಿದ ಮನವಿಯನ್ನು ತೆಲಂಗಾನ ಹೈಕೋರ್ಟು ಪರಿಶೀಲಿಸಲಿದೆ. ಹೈಕೋರ್ಟಿನ ತೀರ್ಮಾನದ ಬಳಿಕವೇ ಅಲ್ಲು ಅರ್ಜುನ್ ರನ್ನು ಜೈಲಿನಲ್ಲಿರಿಸುವುದರ ಅಂತಿಮ ನಿರ್ಣಯವಾಗಲಿದೆ.

ಪುಷ್ಪ -2 ಸಿನಿಮಾದ ಪ್ರೀಮಿಯರ್ ಷೋ ದಿನದಂದು ನಟ ಅಲ್ಲೂಅರ್ಜುನ್ ಸಿನಿಮಾ ಮಂದಿರಕ್ಕೆ ಆಗಮಿಸುತ್ತಾರೆಂಬ ವದಂತಿ ಹರಡಿ ಜನ ಜಮಾವಣೆಯಾಗಿ ಕಾಲ್ತುಳಿತ ಸಂಭವಿಸಿತ್ತು.

ಯಕ್ಷಗಾನದ ವೃತ್ತಿಕಲಾವಿದರಿಗೆ ಉಡುಪಿ ಯಕ್ಷಗಾನ ಕಲಾರಂಗದ ಮೂಲಕ ನೀಡಲಾಗುತ್ತಿರುವ ಬಸ್ ಪಾಸ್ ವಿತರಣೆಗೊಂಡಿದೆ.

ಯಕ್ಷಗಾನ ಕಲಾರಂಗದ, ಯಕ್ಷನಿಧಿಯ ಸದಸ್ಯರಾದ ವೃತ್ತಿ ಕಲಾವಿದರಿಗೆ ಕಳೆದ ಎರಡು ದಶಕಗಳಿಂದ ಕೆನರಾ ಬಸ್ ಮಾಲಕರ ಸಂಘವು ನೀಡುತ್ತಾ ಬಂದಿದೆ. 50% ರಿಯಾಯತಿ ದರದ ಬಸ್‍ಪಾಸ್ ಸೌಲಭ್ಯದ ವಿತರಣೆ ಇಂದು (ಡಿ.13) ಉಡುಪಿ ಐವೈಸಿ ಸಭಾಭವನದಲ್ಲಿ ನಡೆಯಿತು.

ಸಂಸ್ಥೆಯ ಅಧ್ಯಕ್ಷ ಎಂ. ಗಂಗಾಧರ ರಾವ್, ಸಂಸ್ಥೆಯ ಉಪಾಧ್ಯಕ್ಷರೂ, ಬಹುಮೇಳಗಳ ಯಜಮಾನರೂ ಆದ ಪಿ. ಕಿಶನ್ ಹೆಗ್ಡೆ, ಉಪಾಧ್ಯಕ್ಷರಾದ ವಿ. ಜಿ. ಶೆಟ್ಟಿಯವರು ಧರ್ಮಸ್ಥಳ, ಮಂದಾರ್ತಿ ಮೇಳಗಳ ಕಲಾವಿದರುಗಳಾದ ಧರ್ಮಸ್ಥಳ ಚಂದ್ರಶೇಖರ, ಬಿ. ಮಹಾಬಲ ನಾಯ್ಕ್ ಹಾಗೂ ಆನಂದ ಕನ್ನಾರು ಇವರಿಗೆ ಸಾಂಕೇತಿಕವಾಗಿ ವಿತರಿಸಿದರು. ಕಾರ್ಯದರ್ಶಿ ಮುರಲಿ ಕಡೆಕಾರ್ ಬಸ್‍ಮಾಲಕರ ಸಂಘದ ಸಹಕಾರವನ್ನು ಸ್ಮರಿಸಿಕೊಂಡು, ಕಾರ್ಯಕ್ರಮ ನಿರೂಪಿಸಿದರು. ಈ ಸಂದರ್ಭದಲ್ಲಿ ಯಕ್ಷಗಾನ ಕಲಾರಂಗದ ಕಾರ್ಯಕಾರಿ ಸಮಿತಿಯ ಸದಸ್ಯರಾದ ನಾರಾಯಣ ಎಂ. ಹೆಗಡೆ, ವಿಜಯಕುಮಾರ್ ಮುದ್ರಾಡಿ, ಗಣೇಶ್ ಬ್ರಹ್ಮಾವರ ಹಾಗೂ ಕಿಶೋರ್ ಸಿ. ಉದ್ಯಾವರ ಉಪಸ್ಥಿತರಿದ್ದರು. 30 ಮೇಳಗಳ ಸುಮಾರು 600 ಕಲಾವಿದರು ಇದರ ಫಲಾನುಭವಿಗಳಾಗಿದ್ದಾರೆ.

ಎಳೆಯ ಮಕ್ಕಳಲ್ಲಿ ಚೆಸ್ ಆಸಕ್ತಿ ಮೂಡಿಸಿ ಪ್ರೋತ್ಸಾಹಿಸುವ ಉದ್ದೇಶದಿಂದ ಬದಿಯಡ್ಕದ ಮಾಸ್ಟರ್ ಚೆಸ್ ಅಕಾಡೆಮಿ “ಸಂಸ್ಕೃತಿ ಚೆಸ್ ಸ್ಪರ್ಧೆ – ಸೀಸನ್ -1ನ್ನು ಆಯೋಜಿಸಿದೆ.

ಬಾಲ ಚೆಸ್ ಪ್ರತಿಭೆ ಮಾ. ನೈತಿಕ್ ಕೃಷ್ಣ ನ ಬ್ರಹ್ಮೋಪದೇಶದ ಅಂಗವಾಗಿ ಡಿಸೆಂಬರ್ 25ರಂದು ಬೆಳ್ಳೂರು ಶ್ರೀ ಮಹಾವಿಷ್ಣು ದೇವಾಲಯದಲ್ಲಿ ಅಪರಾಹ್ನ 2.30ರಿಂದ ಚೆಸ್ ಸ್ಪರ್ಧೆ ಜರಗಲಿದೆ. ಮಾಸ್ಟರ್ ಚೆಸ್ ಅಕಾಡೆಮಿ ಬದಿಯಡ್ಕ ಇದರ ಪ್ರಮುಖ್ ಪ್ರಶಾಂತ ಎಂ. ಇವರ ಸಂಘಟನಾ ಸಂಯೋಜನೆಯಂತೆ ಸ್ಪರ್ಧೆ ನಡೆಯಲಿದೆ.

ಮಹಾಭಾರತ ಕಾಲದಿಂದಲೇ ಅಖಂಡ ಭಾರತದಲ್ಲಿ ಚೆಸ್ ಎಂಬ ಚದುರಂಗದಾಟ ಜನಪ್ರಿಯವಾಗಿದೆ. ಇದು ಬೌದ್ಧಿಕ ಚಿಂತನ ಶೀಲತೆ ಮತ್ತು ಪ್ರತಿಭೆ ಬಯಸುವ ಆಟವಾಗಿದ್ದು ಎಳೆಯ ಮಕ್ಕಳನ್ನು ಇದರಲ್ಲಿ ತೊಡಗಿಸಿಕೊಂಡರೆ ಅವರ ಕೌಶಲ್ಯಾಭಿವೃದ್ಧಿಯಾಗುತ್ತದೆ.

ಸ್ಪರ್ಧೆಯು ಅಂಡರ್ 9, 12, 15 ಎಂಬೀ ವಿಭಾಗಗಳಲ್ಲಿ ನಡೆಯಲಿದೆ. ಚೆಸ್ ತರಬೇತುದಾರರಾದ ಕುಂಞಂಬು, ಶಶೀಂದ್ರ ಮೊವ್ವಾರ್, ಪ್ರಶಾಂತ ಕುಂಬ್ಳೆ ಸಹಕರಿಸುವರು. ಎಲ್ಲಾ ವಯೋಮಾನದ ವಿಜೇತರಿಗೆ ತ ಲಾ 10 ಪ್ರಶಸ್ತಿಫಲಕ(ಟ್ರೋಫಿ) ಹಾಗೂ ಜನರಲ್ ವಿಭಾಗದಲ್ಲಿ ವಿಜೇತ ಮೂವರಿಗೆ ನಗದು ಬಹುಮಾನ ದೊರೆಯಲಿದೆ. ಈ ಸಂಬಂಧ ಹೆಚ್ಚಿನ ಮಾಹಿತಿಗೆ (9995284422, 8590198284) ಸಂಪರ್ಕಿಸಬಹುದೆಂದು ಪ್ರಕಟಣೆ ತಿಳಿಸಿದೆ

ಕುಂಬಳೆ ಪೇಟೆಯಲ್ಲಿ ಆಟೋ ರಿಕ್ಷಾಗಳಿಗೆ ಸ್ಟೇಂಡ್ ಒದಗಿಸದ ಪಂಚಾಯತ್ :

ನಿರ್ಲಕ್ಷ್ಯ ನೀತಿ ಖಂಡಿಸಿ ರಿಕ್ಷಾ ಚಾಲಕರಿಂದ ಸತ್ಯಾಗ್ರಹ, ಪಂ.ಕಚೇರಿಗೆ ಪ್ರತಿಭಟನಾ ಮಾರ್ಚ್

ಕುಂಬಳೆ ಪೇಟೆಯಲ್ಲಿ ಆಟೋ ರಿಕ್ಷಾಗಳಿಗೆ ಸೂಕ್ತ ಆಟೋಸ್ಟೇಂಡ್ ಒದಗಿಸಿಕೊಡದ ಗ್ರಾಮಪಂಚಾಯತ್ ನಿರ್ಲಕ್ಷ್ಯ ನೀತಿ ಖಂಡಿಸಿ ಸಂಯುಕ್ತ ಆಟೋ ಚಾಲಕರ ಸಂಘದ ನೇತೃತ್ವದಲ್ಲಿ ಅನಿರ್ದಿಷ್ಟಾವಧಿ ಸತ್ಯಾಗ್ರಹ ಆರಂಭಗೊಂಡಿತು.
ಸತ್ಯಾಗ್ರಹದ ಅಂಗವಾಗಿ ರಿಕ್ಷಾ ಚಾಲಕರು ಕುಂಬ್ಳೆ ಗ್ರಾ.ಪಂ.ಗೆ ಇಂದು ಪ್ರತಿಭಟನಾ ಮಾರ್ಚ್ ನಡೆಸಿದರು.

ಕುಂಬಳೆ ಪೇಟೆಯಲ್ಲಿ ರಿಕ್ಷಾಗಳ ಸಂಖ್ಯೆ ಹೆಚ್ಚಳಗೊಂಡಿದೆಯಾದರೂ ಪಂಚಾಯತಿನಿಂದ ನೂತನ ರಿಕ್ಷಾ ಸ್ಟೇಂಡ್ ನಿರ್ಮಾಣವಾಗಿಲ್ಲ. ಪರಿಣಾಮ ಸ್ಟೇಂಡಲ್ಲದ ಜಾಗದಲ್ಲಿ ರಿಕ್ಷಾ ಬಾಡಿಗೆಗೆ ಇರಿಸಿದರೆ ಆರ್.ಟಿ.ಒ ಅಧಿಕಾರಿಗಳು ಬಂದು ದಂಡ ವಿಧಿಸುತ್ತಿದ್ದಾರೆ. ನಮ್ಮದ್ದಲ್ಲದ ತಪ್ಪಿಗೆ ನಾವು ದಂಡ ವಿಧಿಸಬೇಕಾಗುತ್ತಿದೆ. ರಸ್ತೆ ಅಭಿವೃದ್ಧಿಗೊಂಡ ಬೆನ್ನಲ್ಲೇ ಆಟೋ ಸ್ಟ್ಯಾಂಡ್ ಒದಗಿಸಿಕೊಡಬೇಕೆಂದು ಹತ್ತಾರು ಸಲ ಪಂಚಾಯತಿಗೆ ಮನವಿ ಸಲ್ಲಿಸಿದರೂ ಪ್ರಯೋಜನವಾಗದ ಕಾರಣ ಸತ್ಯಾಗ್ರಹಕ್ಕೆ ಮುಂದಾಗಿರುವುದಾಗಿ ರಿಕ್ಷಾ ಚಾಲಕರು ತಿಳಿಸಿದ್ದಾರೆ.

ಪಂ.ಕಚೇರಿ ಮುಂಭಾಗದ ಪ್ರತಿಭಟನಾ ಸಭೆಯನ್ನು ಅಬ್ಬಾಸ್ ಮೊಗ್ರಾಲ್ ಉದ್ಘಾಟಿಸಿದರು. ಸಿಐಟಿಯು ಆಟೋ ಚಾಲಕರ ಯೂನಿಯನ್ ಜಿಲ್ಲಾಧ್ಯಕ್ಷ ಪಿ.ಎ.ರಹ್ಮಾನ್ ಅಧ್ಯಕ್ಷತೆ ವಹಿಸಿದರು. ಷರೀಫ್, ಫ್ರಾನ್ಸಿಸ್ ಡಿ ಸೋಜ, ದಿನೇಶ್ ಎಂ.ಸಿ, ಅಬ್ಬಾಸ್ ಮೊಗ್ರಾಲ್ , ಆಲಿ ಬಾಯಿ ಮೊದಲಾದವರು ನೇತೃತ್ವ ನೀಡಿದರು. ಭೋಜರಾಜ್ ಸ್ವಾಗತಿಸಿದರು.

ಕಾಸರಗೋಡು : ಕೇರಳದ ಕೊಚ್ಚಿಯಲ್ಲಿ ನಟಿಯನ್ನು ಕಾರಿನಲ್ಲಿ ಕರೆದೊಯ್ದು ಆಕ್ರಮಿಸಿದ ಕೇಸಿನಲ್ಲಿ ನಟ ದಿಲೀಪ್ ವಿರುದ್ಧ ಸಾಕ್ಷಿ ಹೇಳಿಕೆ ನೀಡಿದ್ದ ನಿರ್ದೇಶಕ ಪಿ.ಬಾಲಚಂದ್ರ ಕುಮಾರ್ ಮೃತಪಟ್ಟರು. ಚೆಂಗನ್ನೂರಿನ ಖಾಸಗಿ ಆಸ್ಪತ್ರೆಯಲ್ಲಿ ಶುಕ್ರವಾರ ಬೆಳಿಗ್ಗೆ ಕಿಡ್ನಿ ಮತ್ತು ಹೃದಯ ಸಂಬಂಧೀ ಖಾಯಿಲೆಯಿಂದ ಮೃತರಾದರು.

2013ರಲ್ಲಿ ತೆರೆಕಂಡ “ಕೌ ಬಾಯ್” ಸಿನಿಮ ನಿರ್ದೇಶಿಸಿದ್ದ ಅವರು ನಟಿಯನ್ನು ಆಕ್ರಮಿಸಿದ ಕೇಸಿನ 1ನೇ ಆರೋಪಿ ಪಲ್ಸರ್ ಸುನಿ ಎಂಬಾತ ನಟಿಗೆ ದೌರ್ಜನ್ಯ ನೀಡಿದ ದೃಶ್ಯದ ಪ್ರತಿ ನಟ ದಿಲೀಪ್ ಕೈವಶ ಇದೆಯೆಂದು ಹೇಳಿಕೆ ನೀಡಿದ್ದರು.

ನಟ ದಿಲೀಪ್ ಮತ್ತು 1ನೇ ಆರೋಪಿ ಪಲ್ಸರ್ ಸುನಿ ಅನ್ಯೋನ್ಯ ಆತ್ಮೀಯರಾಗಿದ್ದು, ಪ್ರಕರಣದಲ್ಲಿ ತನಿಖಾಧಿಕಾರಿಗಳ ವಿರುದ್ದ ಕೂಡಾ ಇವರು ಸಂಚು ಹೂಡಿದ್ದರೆಂದು ಬಾಲಚಂದ್ರಕುಮಾರ್ ಹೇಳಿಕೆ ಇತ್ತಿದ್ದರು.

ಯಕ್ಷಗಾನದಲ್ಲಿ ನೇಫಥ್ಯದ ಕಾಯಕ ನಿರ್ಲಕ್ಷಿತ ವಿಭಾಗವಲ್ಲ: ತುಮಕೂರಿನಲ್ಲಿ ಯಕ್ಷದೀವಿಗೆ ದಶಮಾನೋತ್ಸವ ಸಂಮಾನ ಮುಡಿದ ದೇವಕಾನ ಶ್ರೀಕೃಷ್ಣ ಭಟ್

ತುಮಕೂರು : ತೆಂಕುತಿಟ್ಟು ಯಕ್ಷಗಾನದ ಸಾಂಪ್ರದಾಯಿಕ ಶುದ್ಧತೆ, ಸ್ವಚ್ಛತೆಯೊಂದಿಗೆ ವೇಷಭೂಷಣ ಮತ್ತು ಆಹಾರ್ಯಕ್ಕೆ ಆರೋಗ್ಯಕರ ಬೆಳವಣಿಗೆಯನ್ನಿತ್ತ ಗಣೇಶ ಕಲಾ ವೃಂದ ಪೈವಳಿಕೆ ಇದರ ಸಾರಥಿ ದೇವಕಾನ ಶ್ರೀಕೃಷ್ಣ ಭಟ್ಟರಿಗೆ ಯಕ್ಷದೀವಿಗೆ ತುಮಕೂರು ತನ್ನ ದಶಮಾನೋತ್ಸವ ವರ್ಷಾಚರಣೆಯ ಗೌರವ ಸಂಮಾನವನ್ನಿತ್ತು ಗೌರವಿಸಿದೆ.

ತುಮಕೂರಿನ ಶ್ರೀಕೃಷ್ಣ ಮಂದಿರದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಹಂಪಿ ಕನ್ನಡ ವಿಶ್ವವಿದ್ಯಾನಿಲಯದ ಕುಲಪತಿ ಪ್ರೊ. ಡಿ.ವಿ.ಪರಶಿವ ಮೂರ್ತಿ, ಕೈಗಾರಿಕೋದ್ಯಮಿ ಎಚ್.ಜಿ. ಚಂದ್ರಶೇಖರ್, ಕಲಾದೀವಿಗೆ ಅಧ್ಯಕ್ಷೆ ಆರತಿ ಪಟ್ರಮೆ, ಶ್ರೀಕೃಷ್ಣ ಮಂದಿರದ ಅಧ್ಯಕ್ಷ ಶ್ರೀನಿವಾಸ ಹತ್ವಾರ್, ಮಾರುತಿ ವಿದ್ಯಾಕೇಂದ್ರದ ಉಮಾಪ್ರಸಾದ್ ಮೊದಲಾದವರು ಜತೆಗೂಡಿ ಸನ್ಮಾನ ನೆರವೇರಿಸಿದರು.

ಈ ಸಂದರ್ಭ ಮಾತನಾಡಿದ ದೇವಕಾನ ಶ್ರೀಕೃಷ್ಣ ಭಟ್ಟರು “ಯಕ್ಷಗಾನದಲ್ಲಿ ನೇಪಥ್ಯವನ್ನು ಮತ್ತು ನೇಪಥ್ಯ ಕಲಾವಿದರನ್ನು ಹಿಂದೆ ಕಡೆಗಣಿಸುತ್ತಿದ್ದರು. ಆದರೆ ಈಗ ಸ್ಥಿತಿ ಬದಲಾಗಿದೆ. ರಂಗದಲ್ಲಿ ಪಾತ್ರಧಾರಿ ಮೆರೆಯಬೇಕಾದರೆ ನೇಪಥ್ಯದ ಕೊಡುಗೆ ಅನಿವಾರ್ಯ. ನೇಪಥ್ಯವೂ ಪ್ರದರ್ಶನ ಮತ್ತು ಕಲೆಯ ಅವಿಭಾಜ್ಯ ಘಟಕ ಎಂದರು.

ಯಕ್ಷಗಾನದಲ್ಲಿ ಹವ್ಯಾಸಿ ವೇಷಧಾರಿ, ಅರ್ಥಧಾರಿಯಾಗಿರುವ ಶ್ರೀಕೃಷ್ಣ ಭಟ್ಟರು ಮಂಜೇಶ್ವರ ಎಸ್.ಎ.ಟಿ ಶಾಲಾಧ್ಯಾಪಕರು. ಯಕ್ಷಗಾನ ವೇಷಭೂಷಣ ಕಾಯಕ ಅವರಿಗೆ ತನ್ನ ತಂದೆ ದೇವಕಾನ ಕೃಷ್ಣ ಭಟ್ಟರಿಂದ ಕೈದಾಟಿದ ಬಳುವಳಿ. ದೇವಕಾನದ ಸಮಗ್ರ ಕೊಡುಗೆಗೆ ಈ ಸಂಮಾನ ಸಂದಿದೆ

• ಗ್ರಾಮೀಣ ಮುಳ್ಳೇರಿಯದ ವಾಣಿಜ್ಯ, ವ್ಯವಸಾಯ ಉನ್ನತಿಗೆ ಉತ್ಸವದ ಕಳೆ ನೀಡುವ ಹಬ್ಬ…
• ಡಿ. 21ರಿಂದ 27ರ ತನಕ ವೈಶಿಷ್ಟ್ಯಮಯ ಮುಳ್ಳೇರಿಯ ಟ್ರೇಡ್ ಫೆಸ್ಟಿವಲ್ : 2ನೇ ವರ್ಷದ ಫೆಸ್ಟ್ ಯಶಸ್ಸಿಗೆ ಸಿದ್ಧತೆ, ಆಹ್ವಾನ ಪತ್ರಿಕೆ, ಟಿಕೆಟ್ ಕೂಪನ್ ಬಿಡುಗಡೆ

ಮುಳ್ಳೇರಿಯ : ಕಾಸರಗೋಡು ಜಿಲ್ಲೆಯ ಗ್ರಾಮೀಣ ಪಟ್ಟಣವಾದ ಮುಳ್ಳೇರಿಯದಲ್ಲಿ ಡಿ.21ರಿಂದ 27ರ ತನಕ ಎರಡನೇ ವರ್ಷದ ಮುಳ್ಳೇರಿಯ ಟ್ರೇಡ್ ಫೆಸ್ಟ್
ನಡೆಯಲಿದ್ದು, ಗ್ರಾಮೀಣೋತ್ಸವದ ಯಶಸ್ಸಿಗೆ ವಿಫುಲ ಸಿದ್ಧತೆ ನಡೆಯುತ್ತಿದೆ.

ಮುಳ್ಳೇರಿಯ ಪೇಟೆ ಮತ್ತು ಪರಿಸರದ ವಾಣಿಜ್ಯೋದ್ಯಮಗಳ ಅಭಿವೃದ್ಧಿ ಮತ್ತು ಉದ್ಯಮ -ಗ್ರಾಹಕ-ನಾಗರಿಕರ ನಡುವೆ ಸವಿನಯದ ಸ್ನೇಹ ಸೇತು ಬೆಳೆಸುವ ಧ್ಯೇಯೋದ್ದೇಶದ
ಟ್ರೇಡ್ ಫೆಸ್ಟ್ ನಲ್ಲಿ ಕೃಷಿಯಂತ್ರ ಮೇಳ, ವಿವಿಧ ರುಚಿಕರ ತಿಂಡಿ ತಿನಿಸಿನ ಖಾದ್ಯಗಳು, ವಿವಿಧ ರೀತಿಯ ಮಳಿಗೆಗಳು, ಮಕ್ಕಳಿಗೂ, ಹಿರಿಯರಿಗೂ ವೈವಿಧ್ಯ ಸಾಂಸ್ಕೃತಿಕ ಮನೋರಂಜನೆ, ವಿವಿಧ ಉತ್ಪನ್ನ, ಯಂತ್ರೋಪಕರಣಗಳ ಮಾಹಿತಿ ಕಾರ್ಯಾಗಾರ, ದೈನಂದಿನ ಸಂಜೆ ಗಣ್ಯರ ಉಪಸ್ಥಿತಿಯ ಸಾಂಸ್ಕೃತಿಕ ಸಂಜೆ ಸೇರಿದಂತೆ ಮುಳ್ಳೇರಿಯ ಪರಿಸರಕ್ಕೊಂದು ಉತ್ಸವ ಪ್ರತೀತಿಯ ಸಂಭ್ರಮ ಮೂಡಿಸಿ ಫೆಸ್ಟ್ ನಡೆಯಲಿದೆ.

ಮುಳ್ಳೇರಿಯ ಪೇಟೆಯ ವೀರೇಂದ್ರ ನಗರದಲ್ಲಿ ದೈನಂದಿನ ಸಂಜೆ 4ರಿಂದ ರಾತ್ರಿ 10ರ ತನಕ ನಡೆಯುವ ಫೆಸ್ಟ್ ನ್ನು ಮುಳ್ಳೇರಿಯ ಬ್ಯುಸಿನೆಸ್ ಅಸೋಸಿಯೇಷನ್ (ರಿ) ಆಯೋಜಿಸಿದೆ. ದೈನಂದಿನ ಸರಾಸರಿ 10 ಸಾವಿರದಂತೆ ಒಂದು ವಾರದಲ್ಲಿ 70ಸಾವಿರ ಮಂದಿ ಫೆಸ್ಟ್ ನಲ್ಲಿ ಪಾಲ್ಗೊಳ್ಳುವ ನಿರೀಕ್ಷೆ ಇದೆ. ಇದರಂತೆ ಈಗಾಗಲೇ ನೂರಾರು ಮಳಿಗೆಗಳ ಮುಂಗಡ ಬುಕ್ಕಿಂಗ್ ನಡೆದಿದ್ದು,ನಾಗರಿಕರಲ್ಲಿದು ಸಂಭ್ರಮ ಮೂಡಿಸಿದೆ ಮತ್ತು ಮುಳ್ಳೇರಿಯ ಪೇಟೆಗೆ ಭಾರೀ ಜನಾಗಮನದ ನವವಸಂತ ಮೂಡಿಸುವ ಭರವಸೆ ಇದೆ ಎಂದು ಸಂಘಟಕರು ತಿಳಿಸಿದ್ದಾರೆ.

ಇದು ಕೇವಲ ವಾಣಿಜ್ಯ ಮೇಳವಲ್ಲ.

ಮುಳ್ಳೇರಿಯದಂಥ ಪುಟ್ಟ ಗ್ರಾಮೀಣ ಪ್ರದೇಶದ ವ್ಯಾಪಾರೋದ್ಯಮವನ್ನು ಮತ್ತು ನಾಡನ್ನು ನಾಗರಿಕರ ಸಹಭಾಗಿತ್ವದಲ್ಲಿ ವಿಕಸನಗೊಳಿಸುವ ಸುಂದರ ಕಲ್ಪನೆ. ಈ ಟ್ರೇಡ್ ಫೆಸ್ಟ್ ಮುಳ್ಳೇರಿಯಕ್ಕೊಂದು ಉತ್ಸವದ ಕಳೆ ನೀಡುತ್ತದೆ. ಸರ್ವ ನಾಗರಿಕರೂ ಇದು ನಮ್ಮ ನಾಡಿನ ಸಂಭ್ರಮವೆಂದು ಪಾಲ್ಗೊಳ್ಳುತ್ತಾರೆ. ಸಾಂಸ್ಕೃತಿಕ ಮನೋರಂಜನೆ, ಶಾಪಿಂಗ್ ನಡೆಸುತ್ತಲೇ ವಿವಿಧ ಉತ್ಪನ್ನ, ಗೃಹಬಳಕೆಯ ಉಪಕರಣ ಇನ್ನಿತ್ಯಾದಿ ಅಪೂರ್ವ ಮಾಹಿತಿಯ ಅರಿವು ಪಡೆಯುತ್ತಾರೆ. ಒಂದೂರಿನ ಅಭ್ಯುದಯದಲ್ಲಿ ಇಂಥ ಹೆಜ್ಜೆಗಳಿಗೆ ಜನರಿಂದ ಸಿಗುವ ಬೆಂಬಲಗಳೇ ಅದರ ಊರುಗೋಲು
-ರಂಗ ಶರ್ಮ ಉಪ್ಪಂಗಳ,

(ಉದ್ಯಮಿ, ಪ್ರತಿನಿಧಿ -ಮುಳ್ಳೇರಿಯ ಬ್ಯುಸಿನೆಸ್ ಅಸೋಸಿಯೇಷನ್)

ಟ್ರೇಡ್ ಫೆಸ್ಟ್ ಯಶಸ್ಸಿನ ಸಮಾಲೋಚನೆಗಾಗಿ ನಿನ್ನೆ ಮುಳ್ಳೇರಿಯ ಗಣೇಶ ಮಂದಿರದಲ್ಲಿ ಬ್ಯುಸಿನೆಸ್ ಅಸೋಸಿಯೇಷನ್ ಸಭೆ ಜರುಗಿತು.
ಸಭೆಯಲ್ಲಿ ಹಿರಿಯ ಉದ್ಯಮಿ ರಂಗನಾಥ ಶೆಣೈ ಮುಳ್ಳೇರಿಯ ಟ್ರೇಡ್ ಫೆಸ್ಟ್ ನ ಆಮಂತ್ರಣ ಪತ್ರಿಕೆ ಬಿಡುಗಡೆಗೊಳಿಸಿದರು.
ಹಿರಿಯ ಪತ್ರಕರ್ತ, ಲೇಖಕ, ಕಣಿಪುರ ಮೀಡಿಯ ಗ್ರೂಪ್ ಎಡಿಟರ್ ಎಂ.ನಾ.ಚಂಬಲ್ತಿಮಾರ್ ಫೆಸ್ಟ್ ನ ಟಿಕೇಟ್ ಬಿಡುಗಡೆಗೊಳಿಸಿದರು.
ಈ ಸಂದರ್ಭ ಫೆಸ್ಟ್ ಗೆ ಶುಭಾಶಯ ಕೋರಿ ಮಾತಾಡಿದ ಅವರು “ಮುಳ್ಳೇರಿಯದ ಉದ್ಯಮಿ, ವರ್ತಕರದ್ದು ಮಾದರಿ ಹೆಜ್ಜೆ. ಇದು ನಾಡಿನ ಪುಟ್ಟ ಪಟ್ಟಣಗಳಿಗೆ , ಅಲ್ಲಿನ ವಾಣಿಜ್ಯ ವ್ಯವಸಾಯ ಪುರೋಗತಿಗೆ ಮಾದರಿ. ಮುಂಬರುವ ದಿನಗಳಲ್ಲಿದು ಗಡಿನಾಡಿನ ಮಹಾ ಫೆಸ್ಟ್ ಆಗಲಿ” ಎಂದರು.
ಮುಳ್ಳೇರಿಯ ಬ್ಯುಸಿನೆಸ್ ಅಸೋಸಿಯೇಷನ್ ಅಧ್ಯಕ್ಷ ಅಗ್ನೇಶ್, ಕಾರ್ಯದರ್ಶಿ ಹರೀಶ್, ಕೋಶಾಧಿಕಾರಿ ಸುರೇಶ್ ರಾವ್, ಫೆಸ್ಟ್ ಸಂಚಾಲಕ ವಿಜಯನ್, ನಿಕಟ ಪೂರ್ವ ಅಧ್ಯಕ್ಷ ರಂಗನಾಥ ರಾವ್, ಉದ್ಯಮಿ ರಂಗ ಶರ್ಮ ಉಪ್ಪಂಗಳ, ಕ್ಯಾಂಪ್ಕೋ ನಿರ್ದೇಶಕ ಕೆ.ಎಸ್.ಎನ್.ಪ್ರಸಾದ್, ಗಣೇಶ ವತ್ಸ ನೆಕ್ರಾಜೆ, ರಂಗನಾಥ ಶೆಣೈ, ಶ್ರೀಕಾಂತ್ ಗುಲಗುಂಜಿ, ಪ್ರಜಿತ್ ಮೊದಲಾದವರು ಉಪಸ್ಥಿತರಿದ್ದರು.

• ಕಾನೂನು ಉಲ್ಲಂಘಿಸಿ ರಸ್ತೆಯಲ್ಲಿ ರೀಲ್ಸ್ ಸಲ್ಲದು:
  ರಸ್ತೆಯಲ್ಲಿ ರೀಲ್ ಚಿತ್ರೀಕರಿಸಿದರೆ ಕಠಿಣ ಕ್ರಮ ಕೈಗೊಳ್ಳಲು ಪೋಲೀಸ್ ಇಲಾಖೆಗೆ ಮಾನವ ಹಕ್ಕು ಆಯೋಗ ನಿರ್ದೇಶ

ಕಾಸರಗೋಡು : ರೀಲ್ಸ್ ಎಂಬ ಮೋಜಿಗೆ ಬಿದ್ದು ಕೆಲವರು ಪ್ರಾಣ ಕಳಕೊಂಡ ಹಿನ್ನೆಲೆ ಗಮನಿಸಿ ಮಾನವ ಹಕ್ಕುಗಳ ಆಯೋಗ ಗರಂ ಆಗಿದೆ. ಸಾರಿಗೆ ಸಂಚಾರ ಕಾನೂನುಗಳನ್ನು ಉಲ್ಲಂಘಿಸಿ , ತಮ್ಮ ಪ್ರಾಣಕ್ಕೂ ನಾಗರಿಕರ ಪ್ರಾಣಕ್ಕೂ ಕಂಟಕವಾಗುವಂತೆ ಸಾರ್ವಜನಿಕ ರಸ್ತೆಗಳಲ್ಲಿ ರೀಲ್ಸ್ ಮಾಡುವವರ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳಬೇಕೆಂದು ಮಾನವ ಹಕ್ಕುಗಳ ಆಯೋಗದ ನ್ಯಾಯಾಂಗ ಸದಸ್ಯ ಕೆ.ಬೈಜುನಾಥ್ ಕೇರಳ ಪ್ರಾಂತ್ಯ ಪೋಲೀಸ್ ಮೇಧಾವಿಗೆ ನಿರ್ದೇಶನವಿತ್ತಿದ್ದಾರೆ.

ಕಲ್ಲಿಕೋಟೆ ಬೀಚ್ ರೋಡಿನಲ್ಲಿ ಪ್ರರಮೋಷನ್ ರೀಲ್ ಚಿತ್ರೀಕರಿಸುತ್ತಿರುವಾಗ ಕಾರುಢಿಕ್ಕಿಯಾಗಿ ವೀಡಿಯೋಗ್ರಾಫರ್ ಮೃತಪಟ್ಟ ಘಟನೆಯ ಹಿನ್ನೆಲೆಯಲ್ಲಿ ಅವರು ಈ ಆದೇಶ ಇತ್ತಿದ್ದಾರೆ.

ರಸ್ತೆ ಸಂಚಾರಕ್ಕಡ್ಡಿಯಾಗುವಂತೆ ರೀಲ್ಸ್ ಚಿತ್ರೀಕರಣ ನಡೆಸಿದವರ ವಿರುದ್ದ ಈಗಾಗಲೇ ಕೈಗೊಂಡ ಕಾನೂನು ಕ್ರಮಗಳ ವರದಿಯನ್ನು ಒಂದು ತಿಂಗಳೊಳಗೆ ಮಾನವ ಹಕ್ಕು ಆಯೋಗಕ್ಕೆ ಒದಗಿಸಬೇಕೆಂದು ಆಯೋಗ ಪೋಲೀಸ್ ಮೇಧಾವಿಗೆ ಸೂಚಿಸಿದೆ.
ರೀಲ್ಸ್ ಚಿತ್ರೀಕರಣದ ವೇಳೆ ಕೋಝಿಕ್ಕೋಡ್ ನಲ್ಲಿ ವೀಡಿಯೋಗ್ರಾಫರ್ ಮೃತಪಟ್ಟ ಘಟನೆ ಕುರಿತು ಕೂಡಾ ಸಮಗ್ರವಾದ ವರದಿ ಒಪ್ಪಿಸುವಂತೆ ಕೋಝಿಕ್ಕೋಡ್ ಪೋಲೀಸ್ ಆಯುಕ್ತರಿಗೆ ಸೂಚಿಸಲಾಗಿದೆ.
ಸಾರ್ವಜನಿಕ ರಸ್ತೆಗಳಲ್ಲಿ ಹುಚ್ಚಾಟ ಮೆರೆದು ರೀಲ್ಸ್ ಚಿತ್ರೀಕರಣ ಮಾಡುವುದು ಇತರ ವಾಹನ ಸವಾರರಿಗೂ, ನಾಗರಿಕ ಪಾದಚಾರಿಗಳಿಗೂ ಜೀವಾಪಾಯದ ಕಂಟಕ ತಂದೊಡ್ಡುತ್ತಿರುವುದರಿಂದ ಇಂಥ ಪ್ರವೃತ್ತಿಗಳ ವಿರುದ್ದ ನಿರ್ದಾಕ್ಷಿಣ್ಯ ಕ್ರಮ ಕೈಗೊಳ್ಳಬೇಕೆಂದು ಅವರು ಪೋಲೀಸ್ ಇಲಾಖೆಗೆ ಶಿಫಾರಸು ಮಾಡಿದ್ದಾರೆ.

ಸಾಮಾಜಿಕ ಜಾಲತಾಣದ ಜನಪ್ರಿಯತೆಗಾಗಿ ರಸ್ತೆಗಳಲ್ಲಿ ಕಾನೂನು ಉಲ್ಲಂಘಿಸಿ ನಾನಾ ರೀತಿಯ ಚಿತ್ರೀಕರಣ ನಡೆಸುವುದನ್ನು ನಿಯಂತ್ರಿಸಲು ಕಠಿಣ ಕ್ರಮ ಕೈಗೊಳ್ಳಬೇಕು ಮತ್ತದರ ವರದಿಯನ್ನು ಸಮರ್ಪಿಸುವಂತೆ ಮಾನವ ಹಕ್ಕು ಆಯೋಗ ಖಡಕ್ ಸೂಚನೆ ನೀಡಿದೆ.